TORPAĞIMIZIN SAHİBİ VƏ ƏTRİ BİRDİR

Amansız və məşəqqətli müharibə çoxumuzun taleyini dəyişib. Mülki vəzifələrimiz, dinc həyatımızın niyyətləri, qayğıları yaddan çıxıb. Yaşlı da, cavan da, necə deyərlər, ağzından süd iyi gələn Vətən oğulları da silaha sarılıb torpaq müdafiəsinə qalxırlar. Ordu sırasına bu gün gələn yurddaşımız döyüşlərdə püxtələşdikdən sonra həmişəlik hərbçi olmaq, Azərbaycan Silahlı Qüvvələrinin adlı-sanlı zabiti kimi yetişmək xəyalına düşür. Bu nədən ola bilər? Bəs niyə deyirlər ki, azərilər hərb sənətini sevmirlər?

Çavuş Qurban Şahkərəm oğlu Əliyev cəbhəyə gələndə Şamaxı Kənd Təsərrüfatı Texnikumunun mühasibat uçotu şöbəsində oxuyurdu. Öz şəxsi həyat amalına görə gələcəyin mühasibi olacaq eloğlumuz hazırda “N” hərbi hissəsinin divizionunda top heyəti komandiridir. Qanlı çarpışmalarda lazımi döyüş təcrübəsi toplayan Qurban birdən-birə fikrini dəyişib: zabit olmaq üçün briqada komandirinə təqrir yazıb. Çavuşu tanıyan zabitlər ona ürəkdən zəmanət veriblər. Lakin zabitlər kursuna oxumağa getsə də, Qurbanı yarı yoldan geri göndəriblər. Ona hərbi məktəbdə “biz artilleriyaçı hazırlamırıq” deyiblər. Halbuki Qurban əsl hərbi məktəbi səngərdə, Vətən müharibəsində fəal surətdə keçib. Xüsusi təhsil almaq döyüşçü təcrübəsinin sadəcə davamı kimi nəzərdə tutulurdu.

Qurbanın döyüş yolu qısa deyil. Ağdərədən tutmuş Kəlbəcərədək bütün cəbhə bölgələrində Vətənin azadlığı naminə qan-tər axıdıb. Bəzən ac qalıb, aylarla şiddətli soyuq havalara dözüb.

Baş leytenant Əbdüləli Həsənov böyük inamla Qurbanı əsl topçu gözündə görür:

- Qurban bizim hissənin savadlı, səriştəli, cəsur əsgərlərindən biridir. Topçuluğa öz həvəsi ilə gəlib və xeyli təcrübə qazanıb. Ağdabanın müdafiəsində hər əsgərin edə bilmədiyi igidlik göstərib. Həmin döyüşdə təsadüfən müəyyən itki verən piyadalarımız birdən-birə gözdən itdilər. Bundan yaxşı istifadə edən düşmənin hərbi qüvvələri az qala hamımızı ayaq altına salacaqdılar. Mən özüm top arxasına keçdim. Qurban isə piyadalarımızın boşalmış mövqeyində özünə sığınacaq tapıb mənə müşahidəçi oldu. Hədəfin koordinatlarını mənə çatdırdı. Mən də top mərmiləri ilə düşmənin ağzını qana buladım. Erməni faşistləri tab gətirməyib hücumu kəsdilər. Bir PDM-i vura bildik, biri isə qaçdı.

Qurban müasir tipli döyüş topunun sirlərini yaxşı mənimsəyib. Top cihazı ilə nişanlama prosesini asan həyata keçirir, atış səviyyəsini düzgün müəyyənləşdirir, bucaq ölçülərini rahat təyin edir. Əsgər olsa da, zabitlər Qurbana topçuluq işində çox etibar edir və etimad göstərirlər.

9 uşaqlı bir kolxozçu ailəsinin üzvü olan Qurban Əliyev çox dözümlü, düşüncəli cavandır. Harada döyüşürsə, orada doğma Şamaxının, Qonaqkəndinin torpaq ətri burnundan çəkilmir. Deyir ki, Azərbaycan torpağının bir sahibi, bir ətri var. Azərbaycan xalqı əsl sahib kimi bu ətri qorumalı, onun murdarlanmasına heç bir vəchlə dözməməlidir.

İbrahim MƏSİMOĞLU

18 dekabr 1993-cü il