YURDSEVƏRLİK

...Yaralı zabit Rəhman İsgəndərov rəngi qaçmış dodaqlarını handan-hana tərpədərək dillənir:

- Orucəli həkim, sənsən?!

- Eşidirəm, cənab mayor, - deyə Orucəli Namazov ona nikbin ruhda cavab verərək yarasını bağlayır.

- Düzünü de görüm, sağ qalacağammı?!

- Sənin kimi komandir də ölümə baş əyərmi? Əlbəttə, sağ qalacaqsan! Bu nə yaralardır ki...

Bu, ötən il olmuş şiddətli döyüşlərin birindən kiçik epizoddur. O zaman ön atəş xəttində qurulmuş tibb məntəqəsində əsas aparıcı həkim, tibb xidməti baş leytenantı Orucəli Şahəsən oğlu Namazov idi. Bu yurdsevər tibb işçisi yaralını ruhdan düşməyə, köməksiz qalmağa qoymur.

Həqiqətən Rəhman İsgəndərov onun yardım etdiyi ən ağır yaralılardan biri idi. Qarın nahiyəsi sağ  tərəfdən yarılmışdı. Bir ayağının budu da kəskin surətdə zədələnmişdi. Orucəli həkim bu igid zabitimizi təkcə öz həkimlik səriştəsi ilə deyil, həm də inamlı sözləri ilə həyata qaytardı.

1960-cı ildə Uzuntala kəndində dünyaya göz açan Orucəli Namazovun həkimlik sənətinə gəlişi asan olmayıb. 1983-cü ildə İjevsk tibb texnikumunu bitirib, feldşer kimi elə həmin şəhərdəcə təcili tibbi yardım stansiyasında çalışıb. Öz biliyinə güvənən eloğlumuz iki il sonra İjevsk Dövlət Tibb İnstitutunun müalicə-profilaktika fakültəsinə daxil olub. Rusiya həyatında günü xoş keçsə də, ana yurdun əvəzini heç nə verməyib. 1992-ci ildə Azərbaycana gələrək Balakən rayonunun mərkəzi xəstəxanasında can həkimi kimi əmək fəaliyyətinə başlayıb. 1993-cü ilin iyulunda isə hərbi komissarlığın çağırışı ilə hərbi xidmətə gedib.

“N” hərbi hissəsinin tibb xidməti zabiti Habil Şirinov öz yoldaşı barədə belə söylədi:

- Orucəlinin həkimlik məharəti ilə ilk dəfə Kəlbəcər döyüşləri zamanı tanış olmuşam. Cəsur tibb işçisidir. Çevikliyi, psixoloji dözümü və savadı məni valeh edir. Yanşaqda, Murovdağda, Nəmirli və Şurabad kəndlərində göstərdiyi fədakarlıq yadımdan heç zaman çıxmayacaq.

Orucəli Namazov müqəddəs xidməti vəzifəsində şəfqətli həkimlik qayğıları ilə yaşayır. Amma qısa məzuniyyətə çıxıb Balakənə - öz ailəsinə, gözəl-göyçək qızlarına baş çəkməyə gedəndə isə bəzən iztirab keçirir. Çünki arxa cəbhədə onu düşünən, ailəsinə qayğı və diqqət göstərənlərə çox az rast gəlir. Məsələn, indiyədək Orucəlinin ailəsi Balakəndə qeydiyyatsız yaşayır. Lazımi sənədlər təqdim olunsa da, hansı səbəbə görəcə rayon icra hakimiyyəti bu döyüşçü ailəsinə nə bir ev ayırır, nə də torpaq sahəsi verir. Halbuki belə ailələr hər cür hörmət və qayğıya daha çox layiqdirlər.

 İbrahim MƏSİMOĞLU

21 sentyabr 1995-ci il