ÖZÜNƏ İNANANLARDAN BİRİ

Bəxtiyar Hacıyevi əsgər vaxtından tanıyıram. Boydan balaca olsa da, böyük işlər, məsul tapşırıqlar yerinə yetirmək gücünə malikdir. Hərbçiyə xas sabit intizam ovqatı var. O zaman Bəxtiyar əsgəri əxlaqın gözəlliyi ilə ruhlanır, şərəfli zabit vəzifəsini icra etməyə can atırdı. Komandanlıq onun bu həvəs və marağını vaxtında qiymətləndirdi.

Hərbi hissənin komissarı – kadr seçimində xüsusi səriştəsi ilə seçilən mayor İntiqam Mirzəyev şəxsi heyətlə daim ünsiyyətdə olduğuna görə Bəxtiyarın içində yaranan idarəetmə işartılarını tez duydu və döyüş tapşırıqlarını bacarıqla yerinə yetirmək qabiliyyətini, habelə fərqli komandirlik keyfiyyətlərini nəzərə alaraq Bəxtiyar Hacıyevə zabit vəzifəsinin həvalə edilməsi ilə bağlı komandanlıq qarşısında vəsatət qaldırdı.

Daha sonra ilk zabit rütbəsi verildi. Həqiqətən bu etimada layiq idi və özünü qısa vaxtda təsdiqlədi.

Bəxtiyar öz tabeliyində olan döyüşçü əsgərlərə qarşı çox həssaslıq göstərirdi. Çünki özü təzəcə əsgər postunu tərk etmişdi. Rəhbərlik etdiyi taqımın hər bir üzvünün qəlbini üzündən oxuyurdu. Ona ünvanlanmış təkliflərin, xahişlərin məzmununu, həm də söz və hərəkətlərin ahəngdar məntiqini tez tuturdu. Ona görə də şəxsi heyətin çalışqanlığına, cəsur fəaliyyətinə təsir edir və fəallıq miqyasını artıra bilirdi. Bəxtiyar döyüş həyəcanı zamanı əsgər qəlbində yaranan təhlükəli alovları vaxtındaca söndürməyi bacarır və döyüş əzmini gücləndirirdi. Bunun nəticəsidir ki, Kəlbəcərdə aparılan uğurlu hərbi əməliyyatlarda onun əsgərləri çox fərqləndilər.

Atəşkəs dövrü hamı kimi Bəxtiyara da çox şey qazandırdı. O, bir yaxşı zabit kimi yetişməkdən ötrü tənəffüs əldə etdi. Xüsusi zabitlik kursu keçdi, daha üstün komandirlik keyfiyyətlərinə yiyələndi.

Çoxdan idi ki, onunla görüşmürdüm. Yaxın günlərdə onun xidmət etdiyi hərbi hissəyə ezam olunduğum vaxt Bəxtiyarın xaraktercə nə qədər möhkəmləndiyinin, zabit kimi formalaşdığının şahidi oldum. İndi o, həm rütbə, həm də vəzifə baxımından yüksəlib. Rəhbərlik etdiyi şəxsi heyət öz hərbi bacarığı, mənəvi-psixoloji hazırlığı sarıdan könülaçan göstəriciləri ilə öncül yerlərdən birini tutub.

Kapitan Bəxtiyar Hacıyev qazandığı müvəffəqiyyətlərin sirrini belə açıqladı:

- Bir müdrik söz var: özünə inananlar yaşamağı bacaranlardır. Mən əsgər kimi hərbi borcumu yerinə yetirərkən milli zabit kadrlarına ehtiyacı nəzərə alaraq özümü bu şərəfli sənətə hazırladım. Əlbəttə, bu qərara gələndə mən öz gücümə inanmışam. Ən böyük həqiqət zəhmətdir Öz zəhmətimə qatlaşaraq ağır hərbi tapşırıqların icrasına girişdim və cəhdlərim boşa çıxmadı. Döyüşlərin ən məşəqqətli anlarında dözümlü olduğumu sübuta yetirdim. Ən başlıcası isə zabitlik, komandirlik səriştəsinə sahib oldum. Hazırda inanıram ki, daha yüksək göstəricilər qazanacağam.

Düzdür, Bəxtiyar öz sözlərində dil pəhləvanları kimi “Vətən”, “Vətən sevgisi” kəlmələrinə müraciət etmədi. Amma getdiyi döyüş yolu, nümunəvi əsgər və zabitlik həyatı onu sübutlandırır ki, Bəxtiyarı bu günəcən orduya bağlayan, ona müvəffəqiyyətlər qazandıran vətənpərvərlik duyğusudur. Əgər yurduna, xalqına, öz müstəqil dövlətinə içində sevgi məşəli yandıra bilməsəydi, onu belə bir görkəmdə, yüksək səviyyədə görə bilməzdik.

İbrahim MƏSİMOĞLU

25 mart 2000-ci il