OLDUM SƏNGƏR MÜXBİRİ

Zəhmət adamından yazıb bənd oldum müxbirliyə,

Bol ruh verdim əməkçiyə, şad mənəvi birliyə,

Dağlıq Qarabağ savaşı səslədi ön cəbhəyə,

Niyə küsüm taleyimdən, oldum səngər müxbiri.

Oldum ilk briqadamızın “komissar” köməkçisi,

Sınadı vətən sevgimi ön xilaskar dəstəsi,

Yazılarım hər hücuma nikbin söz himayəsi,

Niyə küsüm taleyimdən, oldum səngər müxbiri.

Cəbhənin ön xəttidir Murovdağın qayası,

Misilsiz pöhrə verdi hər yazımın mayası,

Dolaşdı igid ruhuna səngər yazı sədası,

Niyə küsüm taleyimdən, oldum səngər müxbiri.

Nəcib xətt saldı qələmim, qoç igid hünərindən,

Azərbaycan əsgərinin əyilməz qamətindən,

Qəlbimə hey su səpildi yazı bərəkətimdən,

Niyə küsüm taleyimdən, oldum səngər müxbiri.

Neçə qələbə xəbəri yazıldı qismətimə,

Tutulan daşnak əsiri yalvardı qələmimə,

Saxta erməni tarixi baş əydi haqq səsimə,

Niyə küsüm taleyimdən, oldum səngər müxbiri.

Bol isti səngər yazıma mükafat “Dan ulduzu”,

Bərq vurur səkkizguşəli Azərbaycan ulduzu,

Bəzədi ordu ömrümü hər qəhrəman ulduzu,

Niyə küsüm taleyimdən, oldum səngər müxbiri.

Daşnak avaz, ritm oğrusu, şər-böhtan abidəsi,

Dilimizin söz oğrusu, usandırdı hər kəsi,

Kəsdi uzanan dilini ordumuzun həmləsi,

Niyə küsüm taleyimdən, oldum səngər müxbiri.

                                                                                                                                                                                                               İbrahim MƏSİMOĞLU

                              

  701 adlı döyüşçü heyətinin “komissar” köməkçisi