QORXMAZIN MƏĞLUBEDİLMƏZ İNAMI

22 yanvar 1994-cü il. Kəlbəcərin azad edilməsi uğrunda aparılan döyüşlərdə Çiçəkli dağ yüksəkliyi çox strateji əhəmiyyət daşıyırdı. Bu yüksəkliyin əldə edilməsi ona görə vacib sayılırdı ki, tunelin üstündə yerləşirdi. Burada düşmənin nəfəsi kəsilməsəydi, heç cür irəli gedə bilməzdik. Briqada komandiri Saleh İlyasov xeyli düşünüb-daşındıqdan sonra həmin istiqamətdə irəliyən 2-ci taborun döyüş fəaliyyətinə rəhbərliyi qərargah zabiti Qormaz Qarayevə tapşırdı. Əlbəttə, qəbul edilmiş bu qərar möhkəm inama söykənirdi. Taborun şəxsi heyəti bu xəbəri eşitdikdən sonra nikbinləşmişdi. Qorxmazın döyüş təcrübəsinin zənginliyi, həmçinin yüksək hərbi peşəkarlıq səviyyəsi hamıya yaxşı bəlli idi. Demək olar ki, briqadada hamı ona hədsiz dərəcədə inanır və bel bağlayırdı. Döyüşçü kollektivinin də birinci şərti - etibardır. Qarşılıqlı etibar olmadan döyüşdə heç bir halda qələbə əldə etmək mümkün deyil.

...Qorxmazın rəhbərliyi ilə 2-ci taborun dayaq məntəqəsi yenicə düşmən tapdağından azad edilmiş Bağırsaq kəndində yerləşdirildi. Öncə ehtiyat tədbirləri görüldü. Sonra seçilmiş cəsur əsgərlərdən ibarət bir kəşfiyyat qrupu yaradıldı. Onlar 8 nəfər idi. Gecə radələrində Çiçəkli dağına kəşfiyyata yollandılar.

Çiçəkli dağının sol tərəfindəki təpədə erməni qüvvələri elə mövqe tutmuşdular ki, dağa gedən yolu gündüz keçmək mümkün deyildi. “İgidin fəndi olmasa, tez basılar”, deyərlər. Qorxmaz Qarayev və tabor komandiri İntiqam Məhərrəmov birgə elə taktiki hiylələr işlətdilər ki, mümkün sayılmayan məsələlərin həllinə də açar tapıldı.

Döyüşçülərimiz iliyə işləyən şaxtalı hava ilə üz-üzə qalmışdılar. Tərslikdən bu gün ötən günlərə nisbətən havanın soyuğu artmışdı. Belə şəraitdə kəşfiyyata getmək çox çətinliklər törədirdi. Kəşfiyyat qrupu gecə açılan təkəmseyrək atəşlərə məhəl qoymadan interval və müəyyən məsafələrlə nəzərdə tutulan nöqtəyə doğru mərdanə hərəkət etdilər. Qorxmazın məsləhətləri hesabına kəşfiyyat qrupu itkisiz irəlilədi.

Səhər 8.15 radələrində mövqe döyüşü başladı. Gücləndirilmiş 1-ci bölük zabit Rəhmanın rəhbərliyi altında düşmənin bir gülləsini də cavabsız qoymadı. Həmin gün Çiçəkli dağına həmlə etmək üçün taktiki şərait alınmadı. Lakin kəşfiyyat qrupu dəyərli məlumatlarla qayıda bildi. Onların yalnız 2 nəfəri yaralanmışdı. Hər ikisinə vaxtında ilkin tibbi yardım göstərildi və təxliyyə edildi.

Növbəti gün döyüş günorta 14.00 radələrində başlasa da, daha intensiv xarakter aldı. Düşmənin təminat yolu taborun minaatanlarının güclü atəşi hesabına darmadağın edildiyinə görə böyük çaxnaşma əmələ gəlmişdi. Hələlik 2-ci bölüyümüz müdafiə mövqeyində durmuşdu. Lakin düşmənə qarşı təzyiq saatbasaat artırılırdı. Nəhayət, günün axırınadək Çiçəkli dağın aşağısındakı sıldırım qayalardan ibarət strateji nöqtələri ələ keçirərək əlverişli həmlə şəraiti yarada bildik.

Qorxmaz Qarayev Çiçəkli dağ uğrunda döyüşün üçüncü gününü həlledici gün elan etdi. Döyüşçülərin fəaliyyət zamanı sıradan neçə ayrılmasına, habelə komanda, siqnal və işarə mənalarının şərti olaraq dəyişdirilməsinə xüsusi fikir verərək lazımi göstərişlər verdi. Həlledici hücumla bağlı məsləhət və göstərişlərini bu sözlərlə tamamladı: “Mən sizə ölməyi yox, öldürməyi əmr edirəm!”

Çiçəkli dağ uğrunda döyüşdə zəncirvari döyüş düzülüşündən istifadə etməyə imkan yox idi. Odur ki, dağ döyüşünün tələblərinə uyğun olaraq hücumu 2 istiqamətdə aparmaq planlaşdırıldı. Tabor komandiri İntiqam Məhərrəmov, demək olar ki, gecə yalnız iki saat gözünün acısını aldı. Səhərə yaxın zabit heyətini dönə-dönə təlimatlandırdı ki, gözlənilməz hallarda özlərini itirməsin, qəfil məqamlarda düzgün hərəkət etsinlər.

Səhər 9.00 radələrində Qorxmaz Qarayev Bağırsaq kəndinin yüksəkliyində özünə yer seçərək hücum əmrini verdi. Maskalanmış mövqelərdən açılan arasıkəsilməz xəncəri atəşlər düşmənin amanını qırdı. Briqada artilleriyasına korrektirovkanı Qorxmazın özü verirdi. Üstəlik taborun minaatanları piyadalarımızın itkisiz irəliləməsini bacarıqla himayə edirdilər. Həlledici zərbələri tank heyətimiz həyata keçirdi və cəmi-cümlətanı 3 saat keçən döyüş ərzində Çiçəkli dağı düşmənin murdar nəfəsindən təmizləndi. Xeyli hərbi qənimət əldə etdik. 4 döyüşçümüz – ağdaşlı Samir, maştağalı Elşad, qaradağlı Mərifət və şamaxılı Elçin şəhidlik zirvəsinə ucaldılar. Onların igidliyi sitayişə layiq bir igidlik kimi heç vaxt yaddaşımızdan silinməyəcəkdir.

P.S. Qanlı yurd döyüşlərində mənəvi şücaəti, hərbi peşəkarlığı kamilləşən Qorxmaz Qarayevə 2012-ci ildə Ali Baş Komandanımızın sərəncamı ilə general-mayor rütbəsi verilmişdir.

                                                                            

                                                                             İbrahim MƏSİMOĞLU

23 yanvar  1994-cü il,

Kəlbəcər rayonu, Çiçəkli dağı.