TOLERANTLIĞIN GERÇƏK CARÇISI BİZİK

                                

                                 

    Müsəlman haqq aşiqidir. Müsəlman olan məkanda ədalət hakimlik edər. Mərhəmətlilik ali qayəmizdir. Həzrət Peyğəmbərimiz buyurmuşdur ki, məbadə müsəlmanı söyəsən, günahkara itaət edəsən, doğru danışanı təkzib edəsən və ya yalançını dəstəkləyəsən. Həmçinin gizlində və ya aşkarda etdiyin hər bir bəd əmələ, səhvə görə tövbə etməlisən. Əfsus ki, adını müsəlman qoyub içində müsəlman qayəsini yaşatmayan bəzi dövlət başçılarının xatakarlığı beynəlxalq aləmdə bizə həyatın hər üzünü göstərir. Bu səbəbdəndir ki, başımıza açılan bəlaların ardı kəsilmir. Sanki kafirliyin iki növü  əmələ gəlib. Onların üzü də tez-tez dəyişir, daxili aləmi də. Kafirlik siyasi dolanbaclarda eybəcər formalar alır, şeytanlığın yeni səhifələri yazılır.

       Özgədən nə gözləyəsən?! Ona görə də yadların pisliyini, xəyanətini təbii qəbul edirik. Böyük güclərin başçılığı altında xristian toplumunun vahid mövqedən çıxış edərək dinc yaşayan müsəlman dövlətlərinə qarşı “səlib yürüşü” açıq kart kimi çoxdan ortaya qoyulub. Gözümüzə girən, beyin qurdumuzu tərpədən bu həqiqətlər düşmənimizi daim xoşlandırır. Onlara qarşı açıq mübarizə nə qədər dar miqyaslı olsa da, çox şükür ki, mövcuddur. Lakin çoxumuz qəflət yuxusundadır. İslam aləminə yönəldilən iqtisadi-siyasi təzyiqlərə cavab verə biləcək güclərimiz öz arxasında inam və inadlı dayaqları görə bilmirlər. Müsəlmana necə gəldi  qarayaxan, müqəddəs müsəlman dəyərlərini gözü götürməyən qüvvələr gözümüzün qabağında kor atı minib köndələn çapırlar. Mən demirəm ki, onlara ucdantutma yox deyək. Əsl müsəlman insanlığı inkar edə bilməz. Bəs, bu bezikdirici haqsızlığa nə qədər göz yummaq olar.

       Əsl müsəlman təkcə özününkülərə deyil, o cümlədən xristian əqidə sahiblərinə  xüsusi ehtiram göstərməyi özünə bəşəri borc hesab edir və bu məqsədlə əməli işlər görür. Ölkəmiz bu sahədə xüsusi nümunə göstərir. Tolerantlığın gerçək carçısı bizik. Daim yıxılan xristianın əlindən tuturuq. Bizə nankorluq etməyi özünə gündəlik iş bilən ermənilərə azmı xeyir vermişik? Bugünkü erməni dövləti bizim torpaqlarımız hesabına hasilə gəlib. Onlara qarşı rəhmdilliyimiz göz önündədir. Biz həmişə onları bağışlamışıq, lakin onlar müsəlman qanı içməkdən doymurlar.

     Nədəndir ki, bizim yaxşılığımız cavabsız qalır. Demokratik dəyərlərdən, fikir və söz azadlığından dəm vuran bəzi xristian əqidəli dövlət rəhbərləri müntəzəm bir tərzdə müsəlman faciələrini kölgə altına salmağa cəhd edir və bizə qarşı uydurma soyqırımlar yaradırlar. Böyük tribunalarda açıq-açığına gunahkara, yalançıya, qəddar insanlara haqq verilir, müsəlman dövlətləri isə süni yollarla, cürbəcür fitnə törətməklə qan içində boğulur. Biz dini toleranlığımızla öyünürük, onlar isə yerli-yersiz müsəlmançılığı ölüm hədəfinə çevirirlər. Görəsən, bəzi müsəlman dövlətləri bu haqsız münasibətlərə qarşı haçan barışmaz mövqe tutacaqlar?!

       Erməni saytlarının verdiyi məlumatlara görə inkişaf yolu tapa bilməyən Ermənistanda iqtisadi məsələlər indi də epidemiya maneələri ilə üzləşmişdir. “Armeniasputnik.am” saytı yazır ki, koronavirus epidemiyası ilk növbədə Ermənistan iqtisadiyyatının iki sahəsinə – turizm və daşımalara güclü zərbə vurmaqdadır. İrəvan şəhərində keçirilən müvafiq mətbuat konfransında bu fikri iqtisadçı Suren Parsyan dilə gətirib. Ermənistanda koronavirusun yoluxması ilə bağlı 3 yeni hal qeydə alınıb (son məlumata görə həmin rəqəm 52-yə çatıb). Onun sözlərinə görə, hazırda Ermənistanda turizm sahəsi ciddi ziyan içindədir. Adətən mart ayında İrandan 30-50 minlik turist axını olurdu. Hesablamalara görə, Ermənistanda hər bir turist orta hesabla 1000 dollar xərcləyir. Əgər 30 min turistin Ermənistana gəlmədiyini düşünsək, belə nəticə çıxar ki, ölkə  artıq 30 000 000 dollar itirib. Bununla yanaşı, bir qayda olaraq, Ermənistanda Novruz günlərində – yəni martın 21-dən əvvəl və sonra İrandan xüsusi axın müşahidə olunurdu.

        Ermənistan rəhbərləri dəfələrlə bəyan etmişlər ki, İran olmasa erməni xalqı yaman günlərə düşər. Bu gün Ermənistanda ticarət sahəsində 600-dən çox İran şirkəti fəaliyyət göstərir. Hətta onlar tərəfindən beynəlxalq qanun müddəalarının  pozulması hallarına göz yumulur. İranlı sanki erməninin böyük qardaşı sayılır. Budurmu müqəddəs Quran hökmlərinə söykənmək?! Laqeyd bir görkəmdə İslam qardaşlığını ayaqlar altına atanlara “salaməleykim” deməyə dəyərmi? Azərbaycanlılara qarşı çox qəddar bir vəhşiliklə törədilmiş Xocalı soyqırımına görə İranın imanlı ruhaniləri işğalçı  Ermənistana etiraz səsini ucaltmaq əvəzinə nə üçün əlavə pənah əlini uzadırlar. Əksinə olaraq İran-Ermənistan əməkdaşlığı ildən-ilə çiçəklənir: nə müsəlman təəssübkeşliyi  yada düşür, nə də müsəlmancılıq şərəfi!

      28 sentyabr 2002-ci il tarixində ATƏT-in Minsk qrupunun həmsədrləri ilə görüş zamanı ulu öndərimiz Heydər Əliyevin dini və siyasi kontekstdə rusiyalı həmsədr Nikolay Qripkovla ibrətamiz dialoqonu yada salmaq istəyirəm: “Orada (Şuşada) çoxdan bir kilsə vardı. Zaman keçdikcə bir qədər uçulub-dağılmışdı, sonra sovet dövründə mən burada işləyəndə bu kilsəni bərpa etdilər, orada Azərbaycan məscidi də var. Bu, ötən əsrin 70-ci illərinin ortalarının söhbətidir. Mən Şuşaya getdim, bütün bunları gördüm. Məscidlərin hamısını və təbiidir ki, bu kilsəni də bərpa etmək üçün tədbirlər gördüm. Lakin bu kilsə Şuşa üçün çox böyük idi, çünki orada ermənilər bir o qədər yaşamırdı. İndi isə bilmirəm, siz görmüsünüz, yoxsa yox, prezident Koçaryan dedi ki, onlar orada daha bir kilsə tikiblər.

     Nikolay Qripkov: Biz kilsədə olmuşuq, deyilənə görə, o 1880-ci ildə tikilmişdir.

     Heydər Əliyev: Bəs oraya gələnlər varmı?

     Nikolay Qripkov: Hər halda orada arxiyepiskop, keşişlər var. Ora gələnlər barədə deyə bilmirəm, biz orada olanda heç kim yox idi.

     Heydər Əliyev: Bəli, arxiyepiskop var. Məsələn, İrəvanda gözəl bir Azərbaycan məscidi var idi, vaxtilə mən orada olmuşdum.

     Nikolay Qripkov: Biz İrəvanda hər halda iki məscid gördük.

     Heydər Əliyev: Münaqişənin ilk dövründə onlar da dağıdılmışdı. Sonra onlar məscidləri iranlılara verdilər və indi deyirlər ki, bunlar Azərbaycan məscidi yox, İran məscididir. İranlılar da müəyyən şəraiti nəzərə alaraq, təbii ki, onları yenidən qurdular və bərpa etdilər. Bəs indi? Onlar bomboşdur, iranlılar isə oraya molla təyin ediblər. Molla məsciddə oturur, orada isə bir nəfər də müsəlman yoxdur ki, məscidə girsin...”

      Sadalanan bu faktlar müsəlman qardaşlığının çox ağır təzahürüdür. Belə olan halda İrana müsəlman ölkəsi deməyə dilimiz necə gələr?! Ermənistan sənin dindaşlarını soyqırıma məruz qoyur, sənin mədəni-dini abidələrini təhqir edir, sən isə ona heç bir irad bildirmir, əksinə təmənnasız yardım və dayaq göstərirsən. Mən belə başa düşürəm ki, bu sayaq kafirlik İran müsəlmanlarının işi deyil. Bu, erməniləri özlərinə qohum sayan fars rejiminin bir xainlik əməlidir.

      Altıncı çağırış Azərbaycan Respublikası Milli Məclisinin ilk iclasında möhtərəm Prezidentimiz İlham Əliyevin erməni vandalizmi və saxtakarlığı barədə açıqladığı mühakimələr məhz əqidə dəyərlərini itirən müsəlmanların açıq xainliyindən xəbər verir: “XX əsrin əvvəllərində Rus imperiyası tərəfindən dərc edilmiş xəritələrə baxmaq kifayətdir görəsən ki, orada indiki Ermənistan ərazisində toponimlərin mütləq əksəriyyəti Azərbaycan mənşəlidir. Bunu demək lazımdır, o xəritələri gətirmək lazımdır. İşğal edilmiş indiki torpaqlarımızın xəritələrini gətirmək lazımdır. Bütün beynəlxalq təşkilatları, orada fəaliyyət göstərən nümayəndələri tanış etmək lazımdır. Eyni zamanda, müsəlman ölkələrinin parlamentlərinin nümayəndələri ilə görüşlər əsnasında mütləq ermənilər tərəfindən dağıdılmış məscidlərimizin şəkilləri göstərilməlidir. Mən bunu edirəm. Bir çox müsəlman ölkələrinin liderlərinə bu şəkilləri göstərirəm. Əgər bunu geniş siyasi elita görsə, onda əlbəttə ki, o ölkələrin rəhbərləri üçün Ermənistan rəhbərləri ilə ağız-ağıza öpüşmək ayıb olar. Biz bunu deməliyik, deməliyik ki, təkcə bizə qarşı yox, bütün müsəlman aləminə qarşı bu faşist rejim müharibə elan edib, bizim məscidlərimiz, tarixi abidələrimiz dağıdılıb. Amma biz bu məlumatı kifayət qədər çatdıra bilmirik. Ona görə bu, xüsusi bir istiqamət olmalıdır.”

         Söz yox ki, diplomatik mərifət qaydalarına uyğun olaraq ölkə rəhbərimiz konkret ad çəkmir. Müdrik bir halda məsləhətini bəyan edir ki, bəlkə, müsəlman qardaşlığını ucuz tutan nakəslər gizlində və ya aşkarda etdiyi hər bir bəd əmələ, səhvə görə tövbə edərək haqq yoluna qayıdarlar. Bu hallar həqiqətən bir müsəlman kimi bizi çox narahat edir.

         “Humanist İslam vəhdəti” deyilən bir dəyərli məsələyə beynəlxalq müstəvidə biganə baxış yalnız təəssüf doğurur. Sözün açığı, say sarıdan korluq çəkmirik. Amma ideya düşmənlərimizə qarşı təsir gücümüz sayımıza uyğun deyil. Mənəvi gücümüzə isə güc çatmaz. Bitib-tükənməyən mənəvi qüdrətimizin sadə xristian aləmində yaratdığı məmnunluq bizləri çox rövnəqləndirir, ruhumuzu oxşayır. Rus xalqının böyük yazıçısı Lev Tolstoy demişkən, istənilən şüurlu insanın son dayanacaq nöqtəsi İslamdır. Bu hikməti dərk etməyin özü bir böyüklükdür...

                                                                                                       İbrahim MƏSİMOĞLU

                                                  müharibə veteran, ehtiyatda olan polkovnik-leytenant