ŞAİR QƏLBLİ ZABİT

Kafir erməni quldurlarından təmizlənmiş bir qayanın gündəyənində Rza dinməz oturub fikirlərə dalır. Qarşısında üzügülər Azərbaycan təbiətinin şahanə bir guşəsi sanki ilahi bir gözəl kimi güzgülənir. Canalan guşəyə əl toxundurmağa cürət etməyən Rza gözü ilə ovladığı təbiət mənalarını ürəyində misralara düzür. Elə bil, bu döyüşçü indicə qanlı savaşdan çıxan Rza deyil. Elə bil, bu eloğlu öz doğma qardaşıtək istədiyi döyüşçüləri dünən torpağa tapşıran Rza deyil.

- Ürəyim Vətən çəkən zülmlərə dözə bilmirsə, Vətənin səadəti naminə şəhid olmağa hazır deyilsə, o etibarsız ürəyi saxlamaram, - deyə zabit Rza Polad oğlu Hessari söhbətə başlayır. – Vətənin bir hissəsi dustaq olsa da, ürəyim azad və əyilməzdir. Əsl hərbçi ağlağan, pərişan olmamalıdır. O, göz yaşı tökən,daim sızlayan yox, düşməni ağladan bir cəngavər kimi döyüşməlidir. Məncə, bu işıqlı dünyada yaşamağın mənası birinci növbədə Vətənin sağlığı ilə bağlıdır. Vətən sağ olmayacaqsa, qəsbkarların top-tüfəngi altında inləyəcəksə, onun qoynunda gəzən vətəndaşın ömür sürməsinin mənası bir qara qəpik qədər dəyərsizdir. Son nəfəsi ağzından çıxanacan məğrur dayanmalı, ümidini itirməməlidir.

Rza Hessari 10 iyul 1993-cü il tarixdən təcavüzkar erməni faşistlərinə qarşı qanlı döyüşlərdə qəhrəmancasına vuruşur. 1969-cu il təvəllüdlü bu igid, öz təbiri ilə desək, tək soltandır. Ona görə ailə qurmur ki, hələ Vətənin bir hissəsi azad nəfəs almır. Amma düşmənə sarsıdıcı zərbələrimizdən sonra elə bir toy məclisi qurmaq fikrindədir ki, nağıllarda deyildiyi kimi, yeddi gün, yeddi gecə keçiriləcək bu şadyanalıq canına çəkən ağrı və iztirabları biryolluq çıxarıb atsın. Bu gün isə düşmənə amansız divan etmək, qanlı toy tutmaq Rzanın başlıca qayğısıdır.

...Üç günlük əməliyyatdan Rza hələ qayıtmamışdı. Lakin Çiçəkli dağından gələn gizli siqnallardan məlum idi ki, onun ehtimalları, qurduğu planın sayalı nəticələri həmləmizin vüsətlənməsinə gözəl töhfə verməkdir. Zabit Əmirov isə acıqlanmışdı. Çünki döyüş nizamnaməsinə görə, Rza əməliyyatın iştirakçısı yox, idarəedicisi olmalı idi. O, danlansa da, öz qoç igidləri ilə birgə dağ başında gecələməkdən, çiyin-çiyinə cəngə çıxmaqdan aldığı ləzzəti heç nə ilə əvəz etmək istəmirdi. Bəzən ümumi məqsədlər üçün lap tərslik də edirdi.

Təsadüfə bir bax: erməni döyüşçülərinin qərargahı Qılınclı kəndində Rəhmangilin evində yerləşdirilmişdi. Fərziyyələri həmişə həqiqətə çevrilən Osman Allahverdiyev gecə yarısı Rzaya hesabat verdi ki, göz müşahidəsində yanılmayıb. Hədəf nöqtəsi məlum yerdədir. Koordinatları hökmən göndərmək lazımdır ki, düşmənin qərargahı vaxtında dağıdılsın. Uğurlu atəşdən sonra Rəhmana zarafatla çatdırdılar ki, doğma dədə ocağını topa tutduqlarına görə onları bağışlasın. Əməliyyatın axırında döyüşçülərimiz elə bir yüksəkliyə çatdılar ki, yeni tamah hissi, talançılıq ehtirası ilə irəliləyən düşmən qəflətən başı üstündən yaxalandı. İgidləri ilə qürrələnən Rza şadlığından dilləndi:

- Bu ki yağlı bir loxmadır. Bunu udmamaq günahdır.

Rza etibarlı döyüşçüsü, sıravi Gəray Həsənova “Muxa”nı hazırlamağı tapşırdı. Həmçinin bir az ləngiməyi məsləhət gördü. Çünki qayanın ortasında lövbər salan dığaların yanına ehtiyat qüvvələr toplanmaqda idi. 1 ədəd “Niva” və 1 ədəd “UAZ” maşını da yaxınlaşanda “Muxa” hədəfə sancıldı. Dığalar pərən-pərən düşüb qaya daşlarının arxasında gizləndilər. Lakin dövrələmə mühasirəyə düşmüşdülər. Əməliyyat iştirakçıları Rzanın komandirliyi sayəsində tələsmədən, bir gülləni də hədər yerə atmadan düşmənə dəhşətli toy tutdular. Bir tərəfdən də topçularımız hədəfin altını üstünə çevirdilər. Dığalar təxminən 70 nəfər canlı qüvvə itirdilər.

Uğurlu döyüşün ən çox tər tökən iştirakçılarından biri kimi Rza Hessari “Hərbi xidmətlərə görə” medalına sahib oldu. Bu sahiblik mərdlik və qəhrəmanlıq yolunda atılan mətin addımları möhkəmlətdi.

Rzanı yaxından tanıyanlar deyirlər ki, onun iki mühüm keyfiyyəti var. Gərgin döyüş saatlarından sonra asudə vaxtlarda Rza son dərəcə şairləşir, müğənni kimi şux səslə oxuyub şənlənir. Bədii yaradıcılıqla müntəzəm məşğul olsa da, yazdığı şeirləri dərc etdirmək istəmir. Özü üçün yazır, özü üçün mənən dincəlir. Əsgər sırası qarşısında duran Rza isə çox zəhmli, hər səhvi güzəştə getməyən zabitdir. Ordu sərtliyi, ordu nizam-intizamı, ordu tələbkarlığı öz əksini onun xarakterində çox parlaq surətdə tapır. Hərbçi xarakteri açılanda döyüşçü Rza şair Rzaya heç bir vəchlə təslim olmur...

Rza öz igidləri ilə daha bir əməliyyata gedir. Yenə öz aləmindədir: döyüşçü vüqarı uca dağlarla bəhsə girir, müvəffəq olacağı uğurun ab-havasını qabaqcadan duyur...

21 may 1994-cü il

İbrahim MƏSİMOĞLU