BASILMAYAN ÖMÜR YAŞA!...

     Medallı zabitimiz Elman Həsənoğlunun təmsil etdiyi bölük Qarabağda yazılan savaş tariximizdə basılmaz bir ömür yaşamışdır. Onun ilk komandiri Yunis Nəcəfov Azərbaycanın Milli Qəhrəmanıdır. Bölüyün 9 əsgəri “Azərbaycan bayrağı” ordeni ilə, 7 nəfəri “İgidliyə görə” medalı ilə təltif edilmişdir. Qələmə aldığım bu döyüşən sətirlər basılmaz bölüyə ithaf edilir.

Ordumun nər sinəsində ilk qüvvətli bir nəfəs,

Yurd möhnətiylə səsləşən dəliqanlı dərin səs,

Dur, çənəsini boş qoyan daşnağın dilini kəs!

Basılmayan ömür yaşa, cəsur Elman bölüyü!

Qara günlü Malıbəyli səndən imdad diləyir,

Qan ağlayan Daşlıdağ da sizsiz çox qəribsəyir,

Həyət-baca yas içində torpaq da irinləyir,

Basılmayan ömür yaşa, cəsur Elman bölüyü!

Yazdı igid tarixini qaya-səngər qovğası,

Tez diz çökdürdü düşməni Murovdağın davası,

Haqq savaşımız bitməyib çalınsın cəng havası,

Basılmayan ömür yaşa, cəsur Elman bölüyü!

Kərkicahan səninlədir, qurtar qara zilləti,

Üç yüz altmış altı saylı alayın xəyanəti,

Qanla yuyulacaq: anlayın bu niyyəti!

Basılmayan ömür yaşa, cəsur Elman bölüyü!

Sizdə əsgər rəşadəti, zabitin qüdrəti var,

Düşməni dərbədər salan savaş məharəti var,

Yurduma can verənlərin namuslu xidməti var,

Basılmayan ömür yaşa, cəsur Elman bölüyü!

Qan axıdır, qopmalıdır, Daşaltı yara qaysağı,

Pas atmasın Ələsgərin qumbaralı darağı,

Son uğurlu bir həmlə çək, tükəndi söz yarağı,

Basılmayan ömür yaşa, cəsur Elman bölüyü!

Milli Qəhrəman Yunisin mərd məramı yaşayır,

Dustaq el-obalarımız yeni igid arayır,

Atəşkəsin sükunəti sinəmizi dağlayır,

Basılmayan ömür yaşa, cəsur Elman bölüyü!

Sən mənim heç vaxt dönməyən müharibə iqbalım,

Könüllərdə parıldayan qələbəli hilalım.

Ordumun can damarına güc verən bir amalım,

Basılmayan ömür yaşa, cəsur Elman bölüyü!

                                  İbrahim MƏSİMOĞLU