“KOMANDİR SƏRT OLMALIDIR”

Mətləb xatırlayırdı ki, cəbhəyə gələndən bircə dəfə də ağır hərbi əməliyyatdan geri çəkilməyib. Xəstə olanda da yataqda çox uzanmayıb. Bəs bu gün niyə onu əməliyyata aparmadılar? Adi soyuqlamaya görəmi?.. Suallar onu rahat buraxmırdı. Nəhayət, özünü ələ alıb ayağa durdu. Qərargahdan öyrəndi ki, 5-ci tabor bu gün üç dəstəyə bölünüb. Bir dəstəyə Ağdərədən gələn yola nəzarət etmək tapşırığı verilib. Digər dəstələr Yanşaq istiqamətində strateji yüksəklikləi ələ keçirməlidirlər. Cəmi iki ədəd 60 mm-lik minaatan qurğusu vardı. Biri Kamran Mustafayevdə idi, digərini isə Mətləb götürüb yola düzəldi.

Mövqe seçdikləri Keçəldağdan Mətləbin gözü su içmirdi. Düşmən buranı görə bilərdi. O, təzəcə xəbərdarlıq etmək istəyirdi ki, zirvəyə bir mərmi düşüb partladı. Əsgərlərimiz daş-qaya arxasında sığınacaq tapıb yerə uzandılar. Qurban Əliyev alnından yaralandı. Mətləb əsgərlərinə yerlərini dəyişməyi əmr etdi. Dalbadal atılan mərmilərdən onlar özlərini itirmişdilər. Mətləb soyuqqanlıqla irəli yeridi. 60 mm-lik minaatan qurğunu çiyninə götürdü. “Mən hərəkət etməsəm, bunların qorxusu çəkilməyəcək”, - deyə düşünərək irəliyə süründü. Özünə təhlükəsiz yer seçib “iş”ə başladı. 6 dəfə atəş açdı. Bu vaxt hava telefonu xəbər verdi:

- Mətləb, işin avand olsun, əla vurursan!

Mətləb tez-tez yerini dəyişirdi. Güllə elə yağırdı ki, sözlə deyiləsi deyildi. Bu vaxt Natiq Cəfərov özünü onun yanına çatdırdı. Mətləb atəş istiqamətini müəyyən edir, minaatan qurğunun dəstəyindən tutur, Natiq isə minaları lüləyə doldururdu. 10-15 dəqiqədən sonra ermənilər yenə atmağa başladılar. Düşmən minasının qəlpəsi Mətləbin sol əlinin baş barmağını yaraladı. O, döyüşə aludə olduğundan bunu hiss etmirdi. Əgər Natiq deməsəydi...

Mətləb Ələsgərov Mingəçevirdəndir. 31 yaşı var. Azərbaycan Silahlı Qüvvələri sıralarına 1993-cü ilin aprel ayından daxil olub. Bundan əvvəl Mingəçevir şəhər yol-tikinti maşınlarının təmiri zavodunda yığıcı çilingərlər briqadasının briqadiri olub. Evində 2 “əsgər” böyüyür. Əmək cəbhəsində sayılıb-seçilən Mətləb Ələsgərov döyüş cəbhəsində də öz hünəri ilə də ad çıxarıb.

Mətləb cəbhəyə hazır gəlmişdi, yəni ona təlim keçmək, hərbi nizamnamələri əzbərləmək lazım deyildi. İki illik əsgərliyini Almaniyada keçirən bu igid hərbi qulluğa çox tez alışmışdı. Döyüşlərə də öz işini gözəl bilən əsgər kimi atılmışdı.

- Mətləb, hansı minaatan yaxşıdır: 60 mm-lik, yoxsa 120 mm-lik? – deyə igid eloğlumuzla söhbətə başlayıram.

- Minaatan elə silahdır ki, onun yaxşı və ya pisi yoxdur. Hamısı döyüşdə düşmənin piyada qüvvələrinin qənimidir. Amma səriştəli və yaxud naşı minaatan əsgər ola bilər.

- Hansı döyüşdə daha çox şücaət göstərmisən?

- Öz-özümü tərifləyə bilmərəm. Lakin danılmaz həqiqətdir ki, batareyamız bütün əməliyyatlarda öz adına layiq döyüşüb. Füzuli bölgəsində bizim əlimizdən düşmən nə zenit qurğusunu, nə də iriçaplı avtomat qumbaraatanı qura bilirdi. Natiq Cəfərov hədəf göstəricilərini elə dəqiq verirdi ki, döyüşçülərimiz düşməni ürəyinin başından odlayırdı. Minaatanlarımız atəşə başlayan kimi ermənilər çaxnaşmaya düşürdü. Aşağı Əbdürrəhmanlı kəndində düşmənin 4 səngər qurğusunu dağıtmışıq.

- Haçandan zabit olmusan?

- Açığı, həmişə zabit vəzifəsini icra etmişəm. Bu il fevralın 19-dan – ilk zabit rütbəsi aldıqdan sonra isə rəsmi olaraq vəzifəyə təyin edilmişəm.

- Səncə, komandir əsasən hansı keyfiyyətlərə malik olmalıdır?

- Ən birincisi bacarıqdır. Hərbi taktikanı bilməyən komandirdən heç nə gözləmək olmaz. İntizamlılıq, vətənpərvərlik, təşəbbüskarlıq, cəsarətlilik də zəruri keyfiyyətlərdir. Lakin mən sərtliyi də çox sevirəm. Komandir kobud, qaba yox, sərt olmalıdır. Bəzən sərtlik pis qarşılanır. Məsələn, bizim bir tabor komandirimiz vardı. Sərtliyinə görə bəzi əsgərlər onu bəyənmirdilər. Lakin bu, ümumi işə çox fayda verirdi...

Müharibə qeyrətli, vətəncanlı igidimiz Mətləb Ələsgərovun həyatına öz təsirini çox göstərib. Bununla belə, o, ömrünün döyüşdə keçən anlarını qiymətli hesab edir. Çünki Vətən qovğasında insan daxilən təmizlənir, saflanır və ən nəhayət, ona həyat verən torpaq qarşısında borcunu ödəyir.

                                                                                21 oktyabr 1994-cü il

 P.S. Mətləb dəyərli səngər qardaşlarımızdan biridir. Döyüş təcrübəsi kifayət qədər var. Minaatan silahın dilini tam mənimsəyib. Onun atdığı minaların yalnız birincisi hədəfdən azacıq aralı düşə bilərdi. İkincisi birbaşa dığanın başında partlayırdı. Biz belə mərd və yüksək səriştəli zabitlərimizlə daim fəxr edirik.

İbrahim MƏSİMOĞLU