HƏLƏ HƏMLƏ DƏMİ DEYİL

      

Bölük səngər yuxusunda, kapitan çəkir yeni plan,

Dayan, əl saxla, komandir, hələ həmlə dəmi deyil.

Biri sevda sorağıyla dad almamış kal yuxudan,

Dayan, əl saxla, komandir, hələ həmlə dəmi deyil.

Nəmli səngər qucağında dar əsgər yataq kisəsi,

Gözü yolda gözəllərin kəsilməz nigaran səsi,

Əl çək savaş yaxasından, dər xəfif sevgi nəfəsi,

Dayan, əl saxla, komandir, hələ həmlə dəmi deyil.

Mürgü döymə, oyan, tez ol, acıqlanır tərs kapitan,

Ürəyinə daş bağlama, gələcək sən deyən zaman,

Dad qələbə sevincini, sən güc al qadir Tanrıdan,

Dayan, əl saxla, komandir, hələ həmlə dəmi deyil.

Müharibə xatirəsi, dil açır hər qan kəlməsi,

Səngər yavan duz-çörəyi, qurumuş pendir tikəsi,

İştaha gəl, ayrı nə var, əlavə dişə çəkəsi?!

Dayan, əl saxla, komandir, hələ həmlə dəmi deyil.

Dodaqaltı zümzümələr, torpağın gözəl qoxusu,

Hələ yol gəlir, tələsmir, bu günün əcəl qorxusu,

Niyə bitmir, tez qurtarmır əsgərlərin eşq yuxusu?!

Dayan, əl saxla, komandir, hələ həmlə dəmi deyil.

                                  İbrahim MƏSİMOĞLU