SÖZÜM XAİN DÜŞMƏNƏDİR

         

Gözlərə pərdə  asma,  ac  qalacaq  ürəyin,

Şeytanlıq  nəyə  lazım,  yerə gələr  kürəyin,  Həyatda  hec  olmasa, bir  kərə  haqq  söyləyin,                            Sənə kəfən olacaq qara qanlı  köynəyin.                               

Haramlıqla  ucalan  dağın  qar görən deyil,

Qarabağ  göyərsə  də  sənə bar verən deyil!

Haram qatma  tarixə, sənə kim  verdi  riza?!

İyrənc  bəd  əməllərin  yığdı  bizi  boğaza,

Dönük  çıxdın  qonşuya, yerin  düşdü  ayaza,

Ay  yağı,  daha gecdir,  sən  gedirsən  güdaza.

Haramlıqla  ucalan  dağın  qar görən deyil,

Qarabağ  göyərsə  də  sənə bar verən deyil!

Sənə  təkcə  torpaq  yox,  havamız  da haramdır,

Süni  dövlət,  haram  yurd:  bu  necə  bir yaşamdır?!

Yalana  inanan kəs  olsa da bir  avamdır,

Əyri  yolun  yolçusu  əvvəl-axır  nakamdır!

Haramlıqla  ucalan  dağın  qar görən deyil,

Qarabağ  göyərsə  də  sənə bar verən deyil!

Səndən  giley  eləyir  neçə Alban  kilsəsi,

Gəlir  özül  daşından  azəri  türkün  səsi,

Sənə  qənim  olacaq Qarabağın  nəfəsi,

Şuşasız  heç  yaşamaz  Azərbaycan ölkəsi!

Haramlıqla  ucalan  dağın  qar görən deyil,

Qarabağ  göyərsə  də  sənə bar verən deyil!

                        İbrahim MƏSİMOĞLU