ERMƏNİ ORDU DİLƏNÇİLİYİ

                                               

  

          Zaman daim həyatımızda hər şeyi ölçür, biçir, hesablayır və hərəyə öz yerini göstərir. Vaxt vardı ki, daxili siyasi çəkişmələr ucbatından biz uçurum qarşısında dayanmışdıq. Fürsət qazanan arxalı düşmənimiz qaniçən siyasətini aramla həyata keçirir, bizə işğal acısı yaşadırdı.  Dövlət çevrilişi cəhdləri baş verəndə isə özümüzü sanki uçurum içində hiss edirdik. Düşmənlə üzbəüz döyüşlərdə əsgərlərimiz mənən güclü olduğuna görə ordumuz alayarımçıq təminatın zəif dayaqları üzərində öz duruşunu çətinliklə saxlaya bilirdi. Bir yandan da dayısı erməni olan sakinlərimiz öz xəyanətindən əl çəkmir, erməni kəşfiyyatına dayaq verərək uğurlarımızın tam nəticələnməsinə əngəl törədirdilər. Bütün maneələrə və daxili siyasi bəlalara baxmayaraq özümüzü zavallı, biçarə hesab etmirdik. Dirənişimiz dığaları heyrətə salırdı. Fədakar və cəsur döyüşçülərimiz hesabına daşnaklara ağır savaşlarda ibrətli dərs verirdik. Bizim güclü iradəmiz, nəhayət, öz sözünü deyə bildi. Zamanın sınaqlarından üzüağ çıxdıq. İkili siyasət yeridən dığalar isə iyrənc beynəlxaq oyunların içərisində olan-qalan simalarını da itirdilər.

       İndi biz möhkəm təməl üzərində  qəti qələbəyə doğru gedirik. Ermənistan isə artıq uçurumun ən təhlükəli bir nöqtəsində haray qoparmaqdadır. Erməni diaspor dəstəyi sönməsə də, sosial şəbəkədə verilən məlumatlara görə bir qismi əks mövqeyə çəkilir. Bu səbəbdəndir ki, Ermənistan ordusunun qida, tibbi ləvazimat və geyim dəstləri ilə təminatında yaranmış problemlərin həlli üçün ianə kampaniyalarının həyəcanlı səsi eşidilir. Erməni saytlarında Ermənistan ordusunun hərbi plaşlara olan kəskin ehtiyacı ödəmək üçün yeni ianə kampaniyasına start verilməsi barədə məlumat yayılıb. Ön atəş xəttində dığalar yağış yağanda selə qərq olurlar. Nəmli geyimdə tez soyuqlayan əsgərlərin sayı artdığına görə hospitala göndəriş sıx növbə sisteminə salınıb. Ən gülünc doğuran fakt ondan ibarətdir ki ianə kampaniyasının  təşkilatçısı yalvarıcı bir tərzdə təkcə  Ermənistanda deyil, habelə xaricdə yaşayan erməniləri 1 dollar məbləğində də olsa, orduya dəstək verməyə çağırıb. Bəzi erməni politoloqları açıq şəkildə etiraf edirlər ki, bu maddi yardım yalvarışı Ermənistan ordusuna xas olan ənənəvi bir problemdir. Hətta o faktı da əlavə olaraq bəyan edirlər ki, toplanan ianələrin bir qismi ordu komandanlığı tərəfindən mənimsənilir, şəxsi məqsədlər üçün müxtəlif maxinasiyalar edilir.

       İanə hesabına ordu saxlamaq nə qədər vaxt çəkəcək?! Bu dilənçiliyin sonu olacaqmı?! Bəs, belə dilənçi durumda olan ordunun bəzi komandirləri nə üçün dil boğaza qoymur, yersiz  öyünərək şərəfsiz qazanılan hərbi uğurlarından dəm vururlar. Ermənistan ordusunun təchizatında ciddi problemlərin aşıb-daşdığını nədəndirsə, dilənçi ölkənin səfeh baş naziri Nikol Paşinyan da son zamanlar  vaxtaşırı dilə gətirir.

       Bu, gələcəkdə baş verəcəyi ehtimal edilən böhranlı halların hələ harasıdır? Nikol hakimiyyəti uçurulduqdan sonra daha çox qaranlıqda qalan bəzi mətləblər açılacaq. Onda Nikolun ağzını yuma bilməyəcəklər. Ümumən desək, erməni ictimai həyatında deyilənə görə öz siyasi xadimlərində fərqli bir vərdiş qabarıq görünür. Onlar vəzifə kreslosundan məhrum olan kimi başlarına ağıl işığı yaman güc gəlir. Həqiqətən daşnak ruhuna zövq verməsə də, erməniyə yaraşmayan bir formada əsl həqiqətləri açıqlamağa meyil göstərir, saxta dövlətin saxtakar əməllərinin üstünü açırlar. Bu mənada Ermənistanın keçmiş baş naziri Qrant Baqratyan qınaq obyektinə çevrilib. Daxili həyəcanını gizlədə bilməyən  Qrant Baqratyan  görün nə deyir:  “Gələcək müharibədə biz nə hücum edə bilərik, nə də Azərbaycanın hansısa obyektini dağıda bilərik? Azərbaycan Ordusunun atəş gücü bizim imkanlarımızdan ən azı 2-3 dəfə çoxdur...Bu gün Azərbaycan ərazisi üzərində müxtəlif növlü radiolokasiya sistemi mövcuddur. Azərbaycan radiolokatorları respublikanın hüdudlarından çox-çox uzaqlara baş çəkməyə qadirdir... Erməni təyyarələri və raketləri sərçə kimi vurulacaq, qisas almaq mümkün olmayacaq. Növbəti müharibə mərhələsi bərpa olunarsa, Azərbaycan bizə heç bir halda qələbə şansı verməyəcək.”

       Erməni siyasi xadimlərinin səfehliyindən o qədər təngə gəlmişik ki, onlardan düz söz eşidəndə məəttəl qalırsan. Necə inanasan ki, ermənidə belə bir zəka var? Bəlkə də, dərindən yoxlasan, Qrant erməni çıxmayacaq. Hər halda rəsmən hökumət başçısı olub. Azərbaycan Ordusunun inkişafını günbəgün izləyib. Yəqin ki, artan hərbi qüdrətimizdən yaranmış qorxu hissləri onu haqq yoluna çıxarıb. İndiki bir durumda sözün düzünü deyən Qranta nə demək olar? Həqiqət evinə doğru gəlişiniz mübarək, ay dığa!

                                                                                                                     İbrahim  MƏSİMOĞLU

                                                                   müharibə veteranı, ehtiyatda olan polkovnik-leytenant