VƏTƏNİ QORUYAN KƏS ƏN ÇOX HÖRMƏT-İZZƏT SAHİBİ OLUR...

          

   
        Öz həyatında haqqı və ədaləti üstün tutmuş dədə-babalarımızdan bizə qalan bir mənəvi məsələ var: vətəni qoruyan kəs ən çox hörmət-izzət sahibi olur. Bu mənada bu gün bizim hərbçilərimiz, ümumən desək,  bütün qazilərimiz başımızın tacıdır. Xalqımız onlarla daim fəxr duyur. Dövlət başçılarımızın da qazilərimizə qayğı və ehtiramı daimidir. Yaxşı yadımızdadır: möhtərəm 1-ci vitse-prezidentimiz Mehriban xanım aprel döyüşçüləri ilə görüşənkən xüsusi bir vurğu ilə bəyan etmişdi ki, bütün qazilər mənim qardaşım sayılır. Həqiqətən səmimi qəlbdən deyilən bu sözlər əməldə də öz gerçək əksini tapır. Tədricən sosial həyatımızın bütün sahələrində bizi narahat edən problemlər bir-bir həll edilir. Hərbçilərin mənzil sarıdan çəkdikləri çətinliklər də planlı şəkildə aradan qaldırılmaqdadır. Təəssüf ki, mövcud imkanlara əsasən tədricən icra edilən mənzil təminatına bəzi müxalif siyasi qüvvələr mənfi rəng vurmağa cəhd edir, dövlətimizi qınamağa can atırlar. Bu xoşagəlməz meyillər bəzən hövsələsi olmayan hərbçilərimizi də dilə gətirir.

       Bizim əziz hərbçilərimiz, Sizə səbirli olmağı tövsiyə edirik. Səbir hər bir hadisədə gözlənilməz hallardan üstün sayılır. Bilin ki, ehtiras alovu ağlın sürüşkən yeridir. Bir anlıq qəzəb adamı bir saatlıq soyuqqanlılıqdan çox-çox uzaqlara aparır. Bu, inanın ki, bizi istəməyənlərin qəsdidir. Ehtiras atının belində oturub ağlını itirməyən adamdan qiymətlisi yoxdur. Söz deməyə nə var ki!... Gərək reallığı dərk edəsən. Əmin ol, sənin haqqını pozan yoxdur, sadəcə işin həlli növbəli olduğuna görə uzanır. Bu mənzil məsələsini sensasiya həddinə çatdırmaq yalnız düşmənə xeyir verir. Bu zaman onlar əl çalıb oynayırlar ki, “biz yaddan çıxdıq, qoy bir-birini ittiham edib bizə rəhmət oxusunlar”. Sizin fikrinizcə, belə halı kim bəyənər?!

        Gəlin ya qonşu dövlətlərimizin, ya da digər dünya ölkələrinin hərbçilərlə bağlı mənzil təminatının vəziyyətini nəzərdən keçirək. Qazaxıstanda bu məsələnin həlli daha uzun çəkir. Dünyaya meydan oxuyan Amerika Birləşmiş Ştatlarında da xidmət ili şərtləri bizdən çoxdur. Yəni hər ölkənin öz maliyyə ehtiyatlarına əsasən konkret təminat proqramı hazırlanır.

        Biz ağır müharibə şəraitində yaşayırıq. Çoxsaylı qaçqınlarımız var. Dövlətimizin xüsusi diqqət və qayğısı sayəsində onların bir qisminin problemi öz həllini tapmışdır. Bir qismi hələ də çətin sosial durumda yaşayır. Onların bütün ehtiyacları məhz dövlətimiz tərəfindən operativ bir şəkildə ödənilir və başqa dünya ölkələri ilə müqayisədə bu istiqamətdə daha üstün göstəricilərə nail oluruq. O cümlədən hərbçilərimiz də heç vaxt yaddan çıxmır. Məsələn, bu günlərdə hərbi qulluqçular üçün inşa edilən növbəti yaşayış binasının açılışı olub. Açılış mərasimində Müdafiə naziri general-polkovnik Zakir Həsənov nazirliyin rəhbərliyi adından tədbir iştirakçılarını təbrik edərək demişdir ki, görülən kompleks tədbirlər ölkə başçısının Silahlı Qüvvələrə göstərdiyi diqqət və qayğının bariz nümunəsidir. Yeni bina dördmərtəbəli, dörd bloklu və 44 mənzillidir. Mənzillər tam təmirlidir. Bütün kommunikasiya xətləri ilə təchiz olunub. Bina üçün nasosxana, hovuz, yarımstansiya tikilib, qaz, su, işıq sayğacları qoyulub, mənzillər mətbəx mebeli və kondisionerlərlə təmin edilib. Ərazi hasara alınıb, asfalt döşənib, uşaqlar üçün şəhərcik salınıb, idman qurğuları quraşdırılıb və yaşıllaşdırma işləri görülüb. Hərbi qulluqçuların ailə üzvlərinin səmərəli istirahəti üçün bütün lazımi şərait yaradılıb.

          Azərbaycanda bu sosial siyasət bundan sonra da uğurla davam etdiriləcək. Ölkəmizin müharibə şəraitində olduğu bir dövrdə belə sosial layihələrin ardıcıl həyata keçirilməsi bir daha sübut edir ki, dövlət siyasətinin mərkəzində insanların taleyi dayanır. O cümlədən hərbçilərimizə xüsusi rəğbət bəslənilir.  Dövlətimizin rəhbəri  öz çıxışlarında daim qeyd edir ki, ömrünü Vətənə xidmətə həsr etmiş insanlara daim diqqət göstəriləcək, onların sosial qayğıları planlı şəkildə həll ediləcəkdir.

        Hərbi qulluqçulara göstərilən xoş və ehtiramlı münasibət könlümüzü çox rövnəqləndirir. Qoy, gözəl vətənimiz daim var olsun, Azərbaycanımız heç vaxt dərd nədir bilməsin! Amin, ya rəbii!...