ŞƏHİD ÜLFƏT KƏRİMOV: “KƏLBƏCƏR İŞĞAL OLUNSA, BİLİN Kİ, MƏN DƏ YOX OLMUŞAM...”

                                                  

          Çox cəsur, əyilməz və dağ vüqarlı qəhrəmanlarımızdan biri kimi xatirimizdən heç vaxt silinməyən Ülfət Kərimov milli hərb tariximizdə öz adını qızıl xətlə yazmışdır. Doğulduğu  Kəlbəcər yurdunun şərəfini qorumaq üçün neçə-neçə misilsiz qəhrəmanlıq nümunələri göstərmiş və mərdanə şəhid olmuşdur. O, riskli manevrlər edərək düşməndən iki tank, iki ədəd “PDM-2”, iki “AQS-17”, iki minaatan (120 mm.-lik) ələ keçirmiş və son nəfəsində xain dığaların üç tankını məhv etmişdir. 701 saylı döyüşçü heyətinin cəsur kəşfiyyatçısı kimi xidmət edən Ülfət Kərimov 1993-cü il martın 27-də Kəlbəcər rayonunun Ağdaban kəndi istiqamətində yerli əhalinin kəndi tərk edə bilməsi üçün ermənilərlə qeyri-bərabər döyüşə girmiş və kənd əhalisinin sağ-salamat kəndi tərk etməsinə nail olsa da, özü Aşıq Şəmşirin məzarı yaxınlığında öz döyüş andına sadiq olaraq müqəddəsliyə qovuşmuşdur. Ü.Kərimov göstərdiyi igidlik əməllərinə görə “Azərbaycan Bayrağı” ordeni ilə təltif edilmişdir.

       Hərbi əməliyyatlarda Ülfət Kərimova böyük inam bəslənirdi. Necə deyərlər, o güllədən yox, güllə ondan qorxurdu. Öz döyüşçü yoldaşları qarşısında xüsusi döyüş andını elan edərkən heç kim onun sözlərinə şübhə etməmişdi. Bilirdilər ki, Ülfət sözünü danan igid deyil. O zaman Ülfət sağ ikən onun adı döyüşçü dillərində əzbər edilmişdi. Motoatıcı briqadamızın təntənəli sıra qarşısında rəsmən elan etmişdi ki, Kəlbəcər işğal olunsa, bilin ki, mən də yox olmuşam. İgid qardaşımız necə demişdirsə, eləcə də şəhid zirvəsinə ucalmışdır.

       Ülfət Kərimov biz veteranlar üçün ölü sayılmır. O, daim bizimlədir. Ülfətin ölməz ruhunun işığı bizim içimizi işıqlandırır. Onun ruhu düşmənə qarşı başlanacaq qəti qələbə döyüşlərində əsas mənəvi dayaqlarımızdan biri kimi qüdrətli varlığımızda cövlan edəcəkdir.