VETERAN YURD AZADLIĞI UĞRUNDA DÖYÜŞMÜŞ CANLI BİR ŞƏHİDDİR

 

      Respublika Müharibə Veteranları Təşkilatlarının Koordinasiya Mərkəzinin sədri

 ehtiyatda olan polkovnik Əzizağa Qənizadə ilə müsahibə 

         – Söz yox ki, xalqımızın döyüş veteranları öz fəaliyyətində hər şeydən öncə yurd müdafiəsi barədə düşünür və öz müqəddəs borclarını yeri gələndə fədakarcasına yerinə yetirirlər. 44 günlük şanlı Vətən müharibəsində də həmin mübariz ruhlu ənənə daha yüksək bir səviyyədə yaşadıldı.

         – Müharibə veteranı adı müqəddəs bir mahiyyət daşıyır. Obrazlı desək, veteran yurd azadlığı uğrunda döyüşmüş canlı bir şəhiddir. Qaneedici haldır ki,  vətənimizin müdafiəsində iştirak edən yurddaşlarımıza həmişə ehtiramla diqqət yetirilir, onların cəsur, qəhrəman və şərəfli əməlləri yüksək qiymətlərə layiq görülür. Çox səmimi bir şəkildə bəyan edə bilərik ki, müharibə veteranları ictimai həyatımızda hörmətli və mötəbər şəxs kimi hərbi-vətənpərvərlik missiyalarını layiqincə davam etdirirlər.

               Erməni işğalçıları üzərində qüdrətli ordumuzun apardığı uğurlu hərbi əməliyyatlarda təcrübəli və əyilməz döyüşçü kimi iştirakımız əsaslı surətdə sübut etdi ki, biz şanlı qələbə müəlliflərindən biriyik. Həmişə milli şərəf və ləyaqətimizi uca tutur, gənclər və yeniyetmələr arasında milli vətənpərvərlik tərbiyəsi ilə məşğul olur, milli dövlətçiliyimizin inkişafına öz şəxsi töhfələrimizi bəxş edirik. Özümüzü məmnun hesab edirik ki, göstərdiyimiz döyüş xidmətləri çox səmərəli və dəyərli nəticələr verir.

        Dünya hərb tarixinə qızıl xətlə yazdığımız 2020-cil il 44 günlük şanlı Vətən müharibəsi başlayanda biz Respublika Müharibə Veteranları Təşkilatlarının Koordinasiya Mərkəzində möhkəm mənəvi təməl üzərində birləşdik və Mərkəzin çox mütəşəkkil təşkilatçılığı sayəsində fəal bir qüvvə kimi iştirak etdik. Müdafiə Nazirliyindən 5 istiqamətdə fəaliyyət göstərmək üçün konkret göstəriş almışdıq. Müharibənin başlandığı gündən etibarən ordumuza hərtərəfli dəstək vermək üçün yüksək vətən duyğuları ilə ayağa qalxdıq. Sözün açığı, hər gün döyüş sevinci yaşadığımız həmin günlərdə Müharibə Veteranları Təşkilatlarının Koordinasiya Mərkəzi çox möhkəm bir dəmir yumruğa çevrilmişdi. Nə gecəmiz bilinirdi, nə də gündüzümüz. Veteranlarımız ön xəttə getmək, döyüşçülərimizlə birgə çiyin-çiyinə vuruşmaq istəyirdilər. Heç kim geri çəkilmirdi.

         – Bizə o da məlumdur ki, hərbi səfərbərlik üçün çağırış yaşı ötmüş veteranlarımız Vətən müharibəsinə biganə dura bilmədilər. Onlar döyüşçülərimizə mənəvi dayaq verməklə yanaşı hərbi əməliyyatlarda birgə iştirak etməyə çalışdılar.

        – Onlar ön atəş xəttində cəsur döyüşçülərimizə əməli dayaq vermək naminə möhtərəm Ali Baş Komandanımız İlham Əliyevə rəsmi məktubla müraciət etdilər ki, yaşlı olsaq da, fiziki imkanlarımız tam tükənməyib, müqəddəs yurd naminə döyüşlərə atılmaq və mənfur erməni işğalçılarından müqəddəs şəhidlərimizin intiqamını almaq istəyirik.  Yuxarı komandanlıqdan biz çox haqlı cavablar aldıq. Yəni döyüş təcrübəsi zəngin olan, həmçinin səfərbərlik məqsədilə hərbi çağırış üçün yaş həddi keçmiş səriştəli və bacarıqlı veteranlarımızdan ibarət bir veteran taboru yaratdıq və ön xəttə göndərdik.     

       – Müharibə Veteranları Təşkilatlarının Koordinasiya Mərkəzi olaraq Sizə göstərilən etimadı tam və yüksək göstəricilərlə doğrultmaq üçün hansı tapşırıqları yerinə yetirdiniz?

       – Demək olar ki, bütün real imkanlardan bacarıqla istifadə etdik. Fəxarət duyuruq ki, erməni faşizmini diz çökdürən şanlı ordumuzun apardığı zəfər yürüşündə biz öz sözümüzü fədakar əməllərimizlə reallaşdıra bildik.  Həm ön, həm də arxa cəbhədə böyük qələbəmiz naminə ordumuza lazımi operativ yardımlar göstərdik. Müasir hərbi-taktiki üslubda aparılan döyüş əməliyyatlarında düşmənə tutarlı zərbə vurmaq üçün ordumuzla birgə çiyin-çiyinə vuruşduq.        

          Müharibə zamanı topladığımız təcrübəni nəzərə alaraq ən çətin tapşırıqları yerinə yetirməyi öhdəmizə aldıq. Kəşfiyyat xarakterli məsələləri də tezliklə həll etdik. “N” saylı hərbi hissənin qarşısında düşmənin alınmaz istehkamlarında olan qüvvələrini darmadağın etmək, habelə yeraltı tunellər üzərində quraşdırılmış müşahidə kameraları ilə idarə olunan silahlar xəttini hərbi-taktiki hiylə yolu ilə keçmək tapşırığını yerinə yetirmək əmrini gözləyirdik. Gücümüzə tam əmin idik. Cəsur veteran taborumuz tutarlı nəticələr qazanırdı.

Mərkəzimizin yaratdığı zəngin təcrübəli veteranlar taborunun bir hissəsi Qubadlı-Laçın istiqamətində  aparılan hərbi əməliyyatlarda fəal iştirak etdi. Ağır döyüşlərdə yara alanlarımız da oldu. Möhtərəm Prezidentimizin 24 iyun 2021-ci il tarixli sərəncamına əsasən Laçın rayonunun işğaldan azad edilməsi uğrunda aparılmış döyüş əməliyyatlarında şəxsi igidlik və şücaət nümayiş etdirmiş 25 nəfər veteranımız “Laçının azad olunmasına görə” medalı ilə təltif edildi. Vətən müharibəsində fərqli göstəriciləri ilə iştirak etmiş 250 veteranımızın da Zəfər bayramı münasibətilə mükafatlandırılması nəzərdə tutulub.           

         Xüsusi olaraq vurğulamaq istəyirəm ki, Müdafiə Nazirliyinin təlim mərkəzlərində hərbi səfərbərlik üzrə çağırılmış əsgərlərə keçirilən təlimlərdə yaxından iştirak etdik və  praktik döyüş nümunələri barədə izahatlarımız xüsusi səmərə verdi. Belə ki, zəngin döyüş təcrübəmiz, dəyərli məsləhət və tövsiyələrimiz tutarlı yarağımıza çevrildi. Gənc əsgərlərimiz bizdən əxz etdiyi savaş bilgiləri sayəsində çox uğurlu həmlələr keçirdilər. Fəaliyyətimiz çoxcəhətli xarakter almışdı. Demək olar ki, əldə etdiyimiz zəngin təcrübə potensialına istinadən hər sahəni əhatə edirdik. Naftalan hospitalında ilkin yardımı veteran həkimlərimiz göstərirdilər. Ön cəbhədə yerləşən hərbi hospitallarda yaralılara tibbi yardım göstərməklə yanaşı uğurlu cərrahiyyə əməliyyatları həyata keçirdik. Bəzi hallarda isə güllə və qəlpə yarası nəticəsində hədsiz qanaxmaya məruz qalan igidlərimizə qanımızla pənah olurduq.

               Fasiləsiz davam edən döyüş əməliyyatlarında zədələnmiş texnikalarımız istifadəsiz bir durumda qalmırdı. Döyüş texnikalarının dilini əzbər bilən veteranlarımız zədə almış tankları, piyadanın döyüş maşınlarını bir neçə qısa zaman ərzində yararlı bir vəziyyətə salırdılar. Təmir işi ilə bağlı qarşıya qoyulan tapşırıqların bir qismi məhz fədakar veteranlarımız tərəfindən icra edilirdi. PDM üzrə mükəmməl biliyə malik olan  veteranlarımız Goran səhra texniki parkında iki gün ərzində sıradan çıxmış və təmirə ehtiyacı olan 12 ədəd PDM-dən 8 ədədini təmir edərək ön atəş xəttinə yola salmışdılar.

   – İndi Koordinasiya Mərkəzi öz fəaliyyətini necə davam etdirir?

   – Həm Vətən müharibəsinə hazırlıq dövründə, həm də uğurlu hərbi əməliyyatlarda olduğu kimi bu gün də fəal mövqe tutmuşuq. Gənc nəslin yüksək  vətən sevgisi ruhunda yetişdirilməsi üçün gördüyümüz işlər daim əməli nəticələr verməkdədir. Belə ki, ordumuzun cəbhədə göstərdiyi kütləvi qəhrəmanlıq nümunələri mövzusunda çoxsaylı layihələr,  müxtəlif tədbirlər həyata keçirir, geniş maraq doğuran bədii və sənədli filmlər çəkir, hərbi mahnı və kliplər hazırlayır, memorial, heykəl, rəsm əsərləri, panorama və maketlər yaradırıq. Cəsur zabit və əsgərlərimizin döyüş ruhunun yüksəldilməsinə yönəldilən rəngarəng süjetli işlərimiz güclü və sönməz hərbi-vətənpərbərlik ideyası əsasında ictimai mənəvi dayaqlarımızı daha da möhkəmləndirir.

   Hərbi-vətənpərvərlik ruhunda gördüyümüz əməli işlər sübut edir ki, Respublika Müharibə Veteranları Təşkilatlarının Koordinasiya Mərkəzi öz nümunəvi iş göstəriciləri ilə ictimai həyatımızda xüsusi rəğbət və maraq hədəfinə çevrilmişdir. Doğma vətənimizin müdafiəsi naminə var qüvvəmizlə çalışırıq.

             

Müsahibəni apardı:

İbrahim Məsimoğlu

müharibə veteranı, ehtiyatda olan polkovnik-leytenant