BİZ DÖYÜŞÇÜLƏR SİZƏ ÇOX GÜVƏNİRİK!

 

                                                 

                                          T Ə B R İ K    M Ə K T U B U

             Hörmətli general-leytenant Kərim Vəliyev!

Sevimli Prezidentimiz, müzəffər Ali Baş Komandanımız İlham Əliyev cənablarının sərəncamına əsasən Müdafiə nazirinin birinci müavini - Azərbaycan Ordusunun Baş Qərargah rəisi vəzifəsinə təyin edilməyiniz münasibətilə Sizi səmimi-qəlbdən təbrik edirəm. 1-ci Qarabağ savaşında ordumuzun təməl daşını qoyan 701 saylı motoatıcı briqadanın döyüşçüsü, təcrübəli hərbi jurnalist və dəyərli iki zabit atası kimi çox yaxşı bilirəm ki, bu təyinat qalib ruhlu Azərbaycan Ordusunun şəxsi heyəti, yurdcanlı Azərbaycan xalqı üçün çox xeyirli bir təyinatdır. Tam əminəm ki, Sizin yüksək sərkərdəlik qabiliyyətiniz, fərqli idarəetmə üslubunuz, üstün hərbçi keyfiyyətləriniz hesabına çox uğurlara imza atacağıq.

Vətən uğrunda müqəddəs savaş və məşəqqətli səngər həyatı hər yurd övladının təkcə vətən eşqinin nə dərəcədə olduğunu sınağa çəkmir, həm də onun mərdliyinin bütün əlamətlərini təbii surətdə aşkara çıxarır. Sizin kimi qüdrətli generallarımızın hünəri sayəsində 2-ci Qarabağ savaşında ordumuz xain düşmənə əsl döyüş dərsi, hücum tənbehi, həmlə cəzası verdi. Peşəkar hərbçi anlamında real döyüşçü general kimi nümunə göstərmək və ön xətdə fədakar mövqe tutaraq ali hədəflərimizə yetişmək fəlsəfəsinin dəyişməz bir məntiqi mövcuddur. Söz yox ki, o məntiq sönməz vətən sevgimizə, Sizin yurdcanlı xarakterinizə əsaslanır. Biz döyüşçülər Sizə çox güvənirik. İnşallah, nümunəvi rəhbərliyiniz altında zəfər tariximiz daha da zənginləşəcək, yeni zirvələr fəth edəcəyik.

Mən bər-bəzəksiz həqiqəti çox sevirəm. Ona görə də həmişə şəxsi mühakimələrimdə gerçəkliyə istinad edirəm. Vaxtilə beş il birbaşa tabeliyinizdə olduğum zaman tam əmin oldum ki, Siz məmləkətimizin müdafiə məsələləri ilə bağlı görülən mühüm işlərdə ordumuzun öncül bir generalı, gerçək həqiqətlərin layiqli daşıyıcısı kimi dəyərli vətən oğlusunuz. Üstün hərbi dəyər və məziyyətlərin ən vacib cəhətləri Sizin təmiz vicdana dayaqlanan əməli fəaliyyətinizdə əks olunur. Yeni başladığınız yüksək vəzifədə Sizə doğma Azərbaycanımızın hərtərəfli tərəqqisi, şanlı ordumuzun döyüş hazırlığının modern bir səpgidə yüksəldilməsi naminə aparacağınız möhtəşəm işlərdə saysız-hesabsız uğurlar arzulayıram.

Hörmətlə

                                       İbrahim Məsim oğlu İsgəndərov

hərbi jurnalist, ehtiyatda olan polkovnik-leytenant,

Mərkəzi Ordu İdman Klubunun mülki işçisi

25 iyul 2021-ci il